My Maandag Storie - 15 Desember 2008

Goeie more uit 'n baie warm Johannesburg. Mensig, ek hoop julle naweek was lekker, want myne was heeeeerlik!! Sou nog graag in die kooi wou gelê het vandag, maar van ons moet werk soos dit arm mense betaam... (Janneman, dankie vir hierdie wysheid!) Wag, kry gou daai koffietjies, sit terug, dan vertel ek... Vrydag net hier by die kantoor gewees. Half 4 sak ons die board-room in, want ons het drinks. mmmm..... ek skink net tequila vir almal. (maak asof ek ook drink, maar my glasie is die hele tyd leeg!!! Hulle kom nie eens agter ek maak net of ek drink nie!) So half 5 kom kuier Christo saam met ons. Teen half 6 is almal weg. Buite begin dit donker word van die onweers-wolke, en skielik sak die reën uit. Was veronderstel om vir Gertruida in Pretoria te gaan haal, maar ons kanseleer dit en gaan haar liewers more haal. Vanaand elk 'n heerlike pie gehad, en net rustig voor die tv gewees. Teen 11 uur onder die appelboom... Saterdag vroeg op. Wag vir Ivy om te kom, en toe's ons oppad. So kwart voor 9 by Thomas. (bly om te sien ek is nie al een wat hou van bietjie laat slaap nie...) Eers diesel gaan ingooi, toe's ons oppad huistoe. So lekker om weer met Gertruida te ry! Eers gou Christo se kar by die huis gaan los, toe Brixton toe. Soek vandag 'n waterpyp vir Gwendolien. Nie hier nie, en ons ry Beras toe in Alberton. Ook nie hier nie! Oorkant is 'n roadhouse, en ons gaan stop daar vir 'n heerlike burger, tjips en coke. Toe terug huistoe. So 2 uur begin klaar maak, want vanaand gaan ons Lucit toe in Pretoria. Net na 3 gery, want ons moet 4 uur by Rudi wees. Daar gekom, en ons wag net vir 2 ouens. So half 5 val ons almal in die pad. Ek, Christo, Rudi, Martin, Clint en Jonathan in Rudi se Toyota, en die ander in hul eie karre. Totaal - 4 karre! Net buite Pretoria het 1 van die ouens probleme met hul kar, en ons doen 'n 'pitstop' langs die pad. Gelukkig nie erg nie, en ons kan weer verder ry. Daar gekom, en dis goed om weer vir Gideon te sien. (het jare gelede een aand daar gekuier, en dit was lekker!) Lucit is 'n restaurant waar die eienaar, Gideon, self die kos voorberei, bedien en saam kuier. Mensig, die tuin is pragtig met al die vis-dammetjies. 'n Lekker laaaaang tafel buite op die stoep, wat uitkyk oor die vis-dam. Ons kuier heerlik. Wel, buiten vir die pragtige en rustige omgewing, was die 3 Great Dane's net so rustig. 3 GROOT swart honde!! Die voorgereg was lekker tuisgebakte brood met lamsboud pattè en 'n groen slaai. Baie lekker! Die hoofgereg was gebraaide aartappels, groente en hoender pastei. Moet bieg, het nie my pastei klaar gemaak nie, want ek was nie mal oor die kors nie. (omtrent almal aan ons tafel het hulle pasteie opgeeët!) Ongelukkig kon ek nie die poeding eet nie, maar dit was roomys met piesang en kerrie. (daar was gemmer in, en Coen is alergies vir gemmer!) Die aand was net te kort, en 11 uur is ons oppad huistoe. Gaan kyk gerus by www.lucit.co.za vir meer inligting oor Gideon se restaurant. Eers gou 'n koppie koffie by Rudi gedrink, en toe huistoe. Teen half 2 onder die appelboom... Sondag net voor 9 op. Vandag wil ek bietjie aan Gertruida werk. Het 2 air-intakes wat ek in die bak wil sit, want daar's nie 'n trek in haar nie! Hopenlik gaan hierdie 'n groot verskil maak. Dis toe nie net 'n tjop-tjop werkie nie... Terwyl ek buite doenig is, maak Christo vir ons lunch. Heerlike tjops, aartappels, broccoli met 'n heerlike kaas sous, rys en soet wortels. Ook Gertruida se enjin gewas. Soos dit maar gaan met 'n ou lady, wil sy nie daarna start nie. Wel, selfs met Christo se hulp, wil sy niks weet nie. Ek is moeg, rooi gebrand van die son, en dit moet maar wag tot more. Sleep myself deur die stort, en skrop my arms van al die olie. Vanaand se kerk het ons buite 'n sang-diens. Elk op 'n kombers buite die sterre-hemel! Ai, ons Dominee weet net hoe om die hart-snare te roer! Na die tyd gaan koffie drink, en toe's ons huistoe. Wel, vandag, 15 Desember, is dit die verjaarsdag van ons goeie vriend Steve. Steve, mag die jaar vol geluk, vreugde en goeie gesondheid wees. Ons kuier vanaand saam met jou....! My wens vir die week:- I carry you with me in my thoughts and heart.... I pray that you be showered in blessings. With love I leave you in God's hands and I thank Him, for in His hands you will be safe. Geniet die week, en tot ons weer gesels; no worries mate, en take care. Coen xxx

Pitstop! Christo, Martin, Kobus, Frans, Rudi en Peter.

Christo in die wynkelder.

C&C

Christo in die tuin van Lucit.

Gideon, die eienaar van Lucit, sy Great Dane's, en Christo.

Die Pan en ekke.

My Vrydag Storie - 12 Desember 2008

Goeie more uit 'n warm Johannesburg. Julle raak seker nou ook al moeg vir my 'goeie more uit 'n warm Johannesburg', maar ons is mos maar altyd ontevrede oor of te warm, of te koud, of te nat, of te droog... En ek geniet die somer, want 'k's mos nie 'n winter-baba nie... Wag, kry gou daai koffietjies, sit terug, dan vertel ek... Maandag my gewone draai by die kantoor gemaak, toe's ek uit. Eers 'n draai by my goeie vriend Janneman gaan maak. Namens dominee Trevor, Christo en myself vir hom 3 rose gevat. ...om te sê ons gee om, ons is lief vir hom, en ons is altyd daar vir hom... Kry ook 'n heerlike koppie koffie! Die dag gaan aan, en ek moet werk. Sien 'n paar werkgewers, en teen 1 uur stop ek gou by Westgate vir 'n chicken en mayo pastei. Ek moet bieg.... nie 1 nie, maar 2!! Hulle is so lekker, dat ek 2 moet eet! En soos die noodlot dit ook moet hê, is dit juis die tyd wat Christo my bel.... (Vanaand sal ek al my kos moet eet, anders gaan ek raas kry...) Die middag vlieg verby, en teen 5 uur is ek terug by die huis. Vanaand maak Christo vir ons heerlike spaghetti en mince. Baie lekker! Hy slag ook vir ons 'n spanspekkie. Wow, dis absoluut stroop-soet lekker!! Net rustig voor die tv vanaand, en teen 11 uur onder die appelboom... Dinsdag weer uit op die pad. 'n Lang dag wat net-nie wil verby gaan nie. Sien 'n paar werkgewers, en teen 2 kry ek vir Christo by Norwood Hyper. Vanmiddag soek ons persente vir die kinders en klein-kinders.... Mensig, julle sal nie glo wat die pryse van speelgoed is nie! Vir 5 nappy's vir 'n pop (ja, mens kry nou ook vir hulle nappy's!!) vyftig rand!! Kan julle glo, dit vir 'n pop! Vandag se kinders word vroeg-vroeg geleer van hoe om mamma's te wees... Omtrent alles gekry waarna ons gesoek het, en net na 5 terug by die huis. Vanaand eet ons sommer van gister aand se spaghetti. Die res van die aand weer voor die tv gelê, en net na 11 in droomland... Woensdag besluit vandag wil ek op kantoor wees. (daar gaan nie veel buite aan nie, en ek kan my tyd beter by die kantoor gebruik.) Daar's admin wat ek kan doen, en ook 2 kondonasie aansoeke wat moet klaar. Gelukkig geniet ek om dit te doen, en tjop-tjop en dis klaar. So ook die dag, want terwyl ek besig was, het die dag gevlieg. Vanaand maak Christo vir ons lekker gebakte hoender, eier-vrug en skorsies! Lekker! Vanaand draai ek persente toe. Ai, dit bly tog so lekker om dit te doen, want ek kan net daai gesiggies sien as hulle die persente oop maak... Teen die tyd wat ek klaar is, is dit ook tyd om bed toe te gaan. Teen 11 uur onder die appelboom... Donderdag ry Christo saam my. Eers 'n draai by sy kantoor gaan maak, en toe's ons oppad. Terwyl hy 'n werkgewer in Pretoria moet sien, gaan ons sommer 'n draai by Sussie ook maak. Lekker skons gekry, en so bietjie gekuier. Die dag stap aan, en ek moet nog in Krugersdorp ook kom. Gaan maak 'n draai by West Rand Pack, toe Hermes, en toe huistoe. Ongelooflik wat net so killo van die huis af gebeur... Die Honda se waterpyp bars, en ek kan nie verder ry nie! Mensig, is dit nie ongelooflik nie....? Dink net as dit oppad van Pretoria af Krugersdorp toe moes gebeur het... En nou gebeur dit basies op my voorstoep! Gelukkig kan ek vir Blackie in die hande kry, en hy kom met sy kar en 'n tou om te kom help. Sleep die kar huistoe, haal die pyp af, want ons wil gou Pirate Parts toe gaan in Norwood om te kyk of ons nie 'n pyp kry nie.... Ongelukkig het hulle nie een nie, en ek sal maar more by Honda moet gaan kyk. Vanaand maak Christo vir ons hoender-lewertjies met mash. Heerlik!! Wel, ek sluit kiekie's in van Peter met al sy boeke, sertifikate en persente wat hy by sy skool se prys-uitdeling gekry het. Peet, baie geluk, en glo my, ons almal is baie trots op jou!! Doen so voort!! Hier is 'n lys van alles wat hy gekry het:- Certificate of graduation (almal). Representative award for representing Kandos School at Regional/State level. Outstanding effort and for achieving excellent results in literacy. Peer award. Citizenship Senior primary. School Captain. DUX 2008 + pen. Kandos School Memorial Spoon. Dan is daar ook kiekie's van my niggie Berdine se dogter, Nadine. Sy het verlede Saterdag die Model van die Jaar kompetisie gewen. Dis nie net haar uiterlike wat so mooi is nie, maar ook haar persoonlikheid. En sy straal haar Christenskap dag na dag uit!! Nadine, baie geluk; jy verdien dit!! Wel, ek sluit nou eers af. My wens vir die week:- Byt vas, hou jou oë gevestig op Jesus en druk deur; Beur net vorentoe. Stry die stryd. Voltooi die wedloop. Behou die geloof - en God sal vir die res sorg! Geniet die naweek, en tot ons weer gesels; no worries mate, en take care. Coen xxx

Peter met al sy boeke.

Nog 'n kiekie van Pieta met al sy pryse.

Nadine - Model van die Jaar

Nadine - Model van die Jaar

Nadine - Model van die Jaar.

My Maandag Storie - 08 Desember 2008

Goeie more uit 'n heerlike koel/warm Johannesburg. Mensig, wat 'n heerlike naweek was dit nie!! Baie rond gery, en ook 'n paar trane weg gepik... Wag, kry gou daai koffietjies, sit terug, dan vertel ek... Vrydag eerste ding op kantoor. Al my admin gedoen, en net na 10 is ek en Christo gou aroma's toe vir 'n koffietjie. Net rustig gesit en kuier. Terug kantoor toe. Les wil hê ek moet 'n geskenk Bruma toe vat, en Craig en Jaco ry sommer saam. Oppad begin dit reën, en glo my, dis sommer 'n wolk-breuk! Two-tieks, en ons is oppad terug. Kan nie wag vir huistoe gaan tyd nie!! Vanaand net rustig by die huis. 'k was nie baie honger vanaand nie, en eers so 9 uur 'n stukkie brood geëet. Net voor die tv gelê, en teen 12 uur in droomland... Saterdag vroeg op, want Ivy is mos hier. Wil vandag 'n draai gaan maak by die roos-plaas anderkant Krugersdorp, want ek's opsoek na 'n roos-bos of twee... Oppad ontbyt gaan eet by Olivia's in Northcliff. 2 eiers, toast, bacon en gebraaide tamaties is heerlik, terwyl Christo 'n ommelet eet. Ai, dis nie dat ons verraaiers is nie, maar so nou-en-dan is ander plekke net so lekker soos Nestcafè! Gou 'n draai gaan maak by my liefste vriend Janneman, en vir hom 'n muffen gevat wat ons by Olivia's gekoop het. Toe verder, want ons dag gaan lank wees... Eers 'n draai gaan maak by die Fizzball & Soap Factory, en raai wie sien ons daar? Mari! my niggie! Gedog dis nou toeval dat ons haar daar raak-loop, totdat sy vir ons vertel dat sy weer daar uithelp. Tog te goed om haar te sien! Toe verder op ons 'quest'! Eers roos-plaas toe, en daar gaan nie veel aan nie. Oppad terug stop ons by Austraflora Nursery, en daar kry ons 'n pragtige marshmallow vark-oor. Onmiddelik koop Christo dit vir my! Net oor Hels-hoogte sit nog 'n kwekery, en daar ook 'n draai gemaak. Toe Garden World toe in Honeydew. Mensig, so lekker om hier rond te loop, want hulle het die pragtigste plante! Koop 2 sakke potting soal, en ook vertiliser. Heel laaste, maar nie die minste nie, maak ons 'n draai by nog 'n kwekery. Ja, julle sal ook dink ons was net by 'n klomp kwekerye hierdie naweek.... maar julle is reg! Gedog dis ons laaste, maar gaan toe Lifestyle toe. Nie lank daar nie, en ons eintlike rede om hier te stop was om 'n bier te kom drink by Primi. Ongelukkig het hulle nie my bier nie, en kyk, dan weet ek ek wil nie hier kuier nie. Gaan liewers huistoe! Het 'n paar plante wat ek wil uitplant, en Christo maak die potte gereed. Dis nie net die pachypodium lamerei wat oorgeplant word nie, maar ook my ander kaktus, en al my vark-ore. Nou gaan hulle groei!! Christo braai vir ons 'n heerlike stukkie wors en ribbetjie, terwyl ek vir ons braai-broodjies maak. Met 'n lekker groen-slaai is dit heerlik!! Vanaand gedaan en moeg na die hele dag se karjakker, en teen 10 uur onder die appelboom... Sondag geslaap tot half 9. Op, en reg vir die dag! Rosebank se vlooi-mark toe, want vandag soek ons persente.... So lekker om hier rond te loop, maar met 'n bier-beursie en ons sjampanje smaak, is dit moeilik om iets te kry. Het gelukkig vir 3 mense 'ietsie's' gekry, en sal vir die ander maar later soek. Terug by die huis van gister aand se braai-vleis geëet. Vanmiddag is dit die afskeids-konsert van Weiss Doubell by Pro Musica, en ons is uitgenooi. Oppad deur 'n storm gery, en die wêreld is nat!! Kon nie verstaan hoekom daar so min karre is nie, maar nadat ons elk 'n drankie in die kroeg gekry het, besef ons net hoe vroeg ons is... Dis nou half 3, en die konsert begin half 4!! Kuier rustig, en stadig kom almal aan. Corman en Karen met die kinders, liewe Leon, Anton en Lizelle, Viv, Steff en Ciela, Mike, Griet en Rudi, tannie Rita, ag, te veel om op te noem... Die orkes klink soos engele-sang, maar dis Weiss wat almal bekoor. Die middag gaan net te gou verby. Ja, wanneer gaan ons weer hier almal saam wees vir 'n opera of 'n simfonie uitvoering? Ek was bevoorreg om deel van Pro Musica te wees met Weiss Doubell aan die stuur. Weiss, alle voorspoed vir die toekoms, en mag die 'aftrede' die begin wees van baie meer. Geniet die rustigheid van tannie Rita, en jou klein-kinders. Na die tyd saam met almal gekuier, ietsie geëet, en net die geselskap geniet. Weiss het ook in my program geskryf... Hier vandaan direk kerk toe. Ja, vanaand is ons vroeg! Dominee Trevor, hoe kan ek dankie sê vir vanaand se diens? Dankie vir die roos, en weet ek gaan myne, Christo s'n en joune more vir Janneman gee. Janneman, vanaand het ek vir jou 'n kersie gebrand... My wens vir die week:- D - dierbaar A - altyd daar N - nooit kwaai K- koelste maatjie I - iemand spesiaal E - ekstra oulik! DIT alles is jy! Dankie dat ek jou in my lewensboekie het. Tot ons weer gesels; no worries mate, en take care. Coen xxx Moeder en Dad - 06 Desember 2008

My Vrydag Storie - 05 Desember 2008

Goeie more uit 'n warm Johannesburg. Mensig, ek hoop nie julle het ook so warm gekry soos ons hierdie week nie! Ons was amper kaiings!! Wag, kry gou daai koffietjies, sit terug, dan vertel ek julle... Maandag gou 'n draai op kantoor gemaak, toe's ek uit. Nie net hier rond nie, maar ook North Riding en Fourways toe. Regtig, dis so warm in die kar dat mens verlang na 'n heerlike koel swembad. (en ek is nie een vir swem nie!!) Die middag omtrent om gewens, en teen half 5 terug by die huis. Vanaand maak Christo vir ons 'n heerlike groen-bone stew. Mensig, dis heerlik!! Vanaand rustig voor die tv, en teen 11 uur onder die appelboom... Dinsdag skaars op, of bel vir Janneman. Dis mos vandag sy verjaarsdag! En toe kan my dag begin. Vandag Roodepoort en Krugersdorp toe. Gaan maak ook 'n draai by West Rand Pack. Op soek na enige plastiese bakke, styrofoum, verpakkings materiaal...? Gaan kyk gerus hierso! Nie regtig enige iets gesoek nie, maar daar uit met 'n sak vol goed. Oppad huistoe eers by Karlientjie (die tuisnywerheid) gestop om 'n heerlike koek te koop, toe by Cresta gestop vir 'n persent vir Janneman, en toe huistoe. Basies net deur die stort gespring, toe oppad. Moet half 7 by Janneman vir ete wees. Mens, en is daar vir jou mense!! Janneman se Dad en Moeder, Frikkie se Dad en Moeder, Johan, Kobus, Jansie en haar man, Philip en Johan, Niggie en haar boyfriend, Egoli, Riekert en Bets, Nico en Sarieta, Derick en Tania, en nog mense wie se name ek nie kan onthou nie... Ons kuier heerlik, en natuurlik is Janneman se kos uit die boonste rakke! Heerlike hoender pasty, mince pasty, rys en heerlike slaai. Vir poeding.... 'n klomp koeke en terte om uit te kies! Daar is kos vir 'n hele army! en alles is so lekker...! Ons lyk so goed, want ons eet so goed! Teen half 11 moet ons ry, want more is 'n lang dag. Skaars my kop op die kussing gesit, of ek's in droomland... Woensdag op kantoor. Vandag begin met 'n klomp compliance arbitrasies. Soos dit maar gaan, daag niemand mos op nie. Gelukkig gee dit my tyd om al die awards te skryf. Met die pro-forma gaan dit vinnig. Die dag vlieg behoorlik! Vanaand net rustig by die huis, en Christo maak vir ons heerlike skaap roast, met groente en rys. Ai, dit bly maar lekker! Vroeg voor die tv plat geval, en net na 11 in droomland... Donderdag weer op kantoor, want vandag is dit konsuliasies. Wel, hoop dit gaan beter as gister! Met die half 10 vergadering kan ons nie 'n skikking beryk nie, maar wel met die 11 uur vergadering. Bly daaroor, want as hierdie een vir arbitrasie moes gaan... Die res van die middag aan die laaste awards geskryf, en teen 4 uur klaar. Rustig by die huis vanaand. Sommer 'n lekker tjou-tjou gehad met brood, en die res van die aand voor die tv. Teen 9 uur sak hier 'n bui reën uit wat tot die tv se sein belemmer. Nie dat ek kla nie, maar nou kan ons nie Dirty Sexy Money klaar kyk nie.... Vanaand gaan ons lekker slaap... Wel, my wens vir die naweek:- Elke sonsopkoms; elke voëlsang; elke groen blaar; elke bui reën; dis God wat sê: 'Dis Ek, neem My hand, Ek wil jou seën en van vreugde laat lag!' Tot ons weer gesels; no worries mate, en take care. Coen xxx

Annabel, Ruan, Nadia, Hein en Blue die Great Danne.

Kyk!! Nadia se tand is uit!

Birthday-boy Janneman en Frikkie.

Janneman en Frikkie saam met Jan se Moeder en Dad.

Ek en Christo.

Christo met Janneman se kind.

Schalk - ons onthou...

"They shall grow not old, as we that are left grow old;

Age shall not weary them, nor the years condemn.

At the going down of the sun and in the morning,

We will remember them."

~Laurence Binyon~(1869-1943)

Schalk, vandag sou ons weer party gehou het...

My Maandag Storie - 01 Desember 2008

Goeie more uit 'n heerlike nat Johannesburg.

Mensig, ek't gedog as ek My Storie skryf, sal ek bietjie rus, maar dit lyk nie so nie.... Al sit ek, moet die gedagtes maar werk om alles van die naweek te onthou! Wag, kry eers daai koffietjies, sit terug, dan vertel ek... (Dominee, ek hoop dis 'n warm koppie koffie!)

Vrydag mos ons werks-funksie gehad. Vroeg op kantoor gewees, en so teen 12 almal restaurant toe. In Parkview gaan eet by .......? (sorry, kan nie die plek se naam onthou nie) 'n Klomp van ons saam met Wayne in sy kombi - en na dese kan ek verstaan hoekom ons taxi-comuters nooit lag, gesels of smile nie.... hulle bid die hele tyd om veilig anderkant te kom!! Wayne, dankie dat ek saam met jou kon gery het, en dankie vir 'n onvergeetlike ondervinding, maar volgende jaar ry ek met my eie kar... Wel, en kuier ons nie lekker by die plek nie! My keuse van 'n starter is basil en tamatie sop (heerlik!!), as hoofgereg is dit kalkoen (bietjie droog, maar ook lekker!!), en as poeding crepe met vrugte in! Dit was absoluut heerlik!! Daar gekom 12 uur, en eers 4 uur daar uit. Tim, Les, baie dankie! Van ons is terug kantoor toe om daar verder te kuier. Nou nie 'n hot party nie, maar ons kuier lekker. Christo het so 6 uur saam kom kuier, en teen 7 is alles verby. Lesley wou nog gehad het ons moes saam verder gaan kuier by Radizios in Victory Park, maar ek het nie kans gesien nie! Vanaand wil ek net rustig by die huis wees, en dalk vroeg in die kooi wees. Wel, was vroeg in die kooi, maar tv gekyk tot net na 12. Gou-gou onder die appelboom...

Saterdag vroeg op, want ons het baie om te doen. Na die nuwe President Hyper in Krugersdorp toe om 'n paar goedjies te kry vir die huis. Mensig, so baie mense, maar ons is daar!! Koop bietjie groceries, en teen 1 is ons daar uit. Oppad huistoe by die Fruit & Veggie by Hillfox gestop om daar ook 'n paar goedjies te kry. Uiteindelik is ons oppad huistoe.... Wel, nadat ons eers gou by Cresta ook gestop het... Terug by die huis, en Christo bak eers weer 2 broodjies vir vanaand. Gaan mos by Rudi kuier - hamburger aand!! Mensig, toe ons net voor 5 hier ry, het ons nie geweet dit sal so 'n lang en lekker aand word nie... Vanaand is dit die gewone groepie. Rudi, Kobus, Clinton, Jonathan, Frans, nog 'n Kobus, Martin (wat later gekom het) en natuurlik ek en Christo. Ai, ons kuier lekker, en die burgers wat ons elk maak, is heerlik! (Elke persoon het iets gebring vir die burger. Ons lysie was kaas en pynappel.) Later begin ons mos toe Noot vir Noot speel, met Frans as ons eie... ja, hy't ook 'n geblomde onderbaadjie aangehad! Die aand het gevlieg, en toe ons weer kyk, is dit net voor 3 uur!! Nee, nou moet ons huistoe!! Wat 'n aand, en watse wonderlike vriende!! Rudi, baie dankie vir weer 'n onvergeetlike aand, en dankie dat jy een van ons vriende is! Nogmaals dankie vir jou gasvryheid, en onthou jy is 'n baie spesiale persoon!! Kan nie onthou wanneer laas het ek by die huis gekom as die voëltjies fluit nie... My kop het skaars die kussing geraak (net voor 4...) en toe's ek weg...

Sondag die wekker gestel vir 10 uur... Wou nog bietjie lê, maar ons moet op. Vandag is dit lunch saam met Corman en tannie Karen by Angie's in Honeydew... Eers gou by Cresta in gehardloop om by die tuisnywerheid 'n bordjie soet en sout te kry vir vanaand se kerk, en toe's ons vort. Met die plek gereël dat ons dit net na 4 sal kom haal, want anders raak dit suur in die kar... (dis mos warm in die kar, en die room gaan suur word...) Die dame by die tuisnywerheid verseker ons nogal hulle is oop tot 5 uur!! Wel, is Angie's nie 'n wonderlike plek nie. Buite op 'n kleinhoewe, met plek vir die kinders om te speel en te swem, terwyl die grootmense kuier en hulle self verlustig in die heerlike kos van Angie's! Corman en tannie Karen met hulle kiddie's Werner en Wilmari, Mark en Elsabè, Stef en Ciela, Mike en Griet en klein Rudi, en nog mense wat ek nie die name van kan onthou nie. Ek en Christo bestel elk 'n voorgereg.... slakke in phylo deeg. Julle kan net dink hoe lekker dit moes gewees het... Heerlik!! Vir hoofgereg vat ek beesstert in 'n rooi wyn, en Christo eet eend. Nee kyk, hier kan ons gerus weer kom kuier. Miskien volgende keer vir Dad en Moeder bring as hulle kom kuier... Ons kuiertjie vlieg verby, en net voor 4 is ons weer oppad. Die volgende afspraak wag... Eers gou by Cresta gestop om ons soet en sout by die tuisnywerheid te kry... en daar's hulle toe!! Kan julle glo, hulle is toe!! dit nadat die vrou vir ons uitdruklik gesê het hulle is oop tot 5 uur! Christo bel toe maar die 'nood nommer', en daar verseker die partner sy kom dadelik om ons te help. Wow, ek sal beslis weer by hulle koop, want die diens was wonderlik! Al die pad van Greenside af gekom net om ons soet en sout uit die yskas te haal. Karen, julle kry my 'thumbs up' vir diens! Gou 'n draai by die kerk gemaak om ons lees-stukke te oefen, toe huistoe om ons deur 'n stort te sleep, en toe weer terug kerk toe. Vanaand is ons Kerssang diens, en dominee Trevor het vir my en Christo gevra om stukkies uit die Bybel voor te lees. Wat 'n wonderlike diens was dit nie. Menigte mense het 'n traan afgevee toe daai 3 kindertjies van die Abram Kriel Kinderhuis so mooi gesing het... ek inkluis! Ek het net weer opnuut besef hoe bevoorreg ek is om nog my Dad en Moeder saam om die Kerstafel te kan hê... Na die tyd saam met almal gaan koek en tee, en teen 9 huistoe.

Wel, Dinsdag die 2de verjaar my liefste vriend Janneman, en Donderdag die 4de sou dit my liefste vriend Schalk se verjaarsdag gewees het. Janneman, ek wens vir jou net die mooiste toe vir die jaar wat kom. Mag jou dae gevul wees met sonskyn, reën op jou lande, en rose in jou hart. My vriend, onthou ek is oneindig lief vir jou, en ek wens dit vir jou toe wat ek graag vir myself wil hê!!!

My wens vir die week:-

When we share laughter, there's twice the fun. When we share success, we surpass what we've done. When we share problems, there's half the pain. When we share tears, a rainbow follows rain. When we share dreams, they become more real. When we share a smile, then our love shows... Thanks for being my friend!!

Geniet die week, en tot ons weer gesels; no worries mate, en take care.

Coen xxx

Die Deacon's 'down under' se nuwe baba....

Oom Corman en tannie Karen.

Kyk net hoe groot het Werner en Wilmari geword!!

Mamma Grethe, klein Rudi en Cecile.

Christo met Rudi Schùsler.

My Vrydag Storie - 28 November 2008

Goeie more uit 'n warm Johannesburg. Ek hoop julle het 'n heerlike week gehad? Wel, myne was soos altyd mos 'n SC week! Wag, kry gou daai koffietjies, sit terug, dan vertel ek... Maandag op kantoor, want vandag het ek 'n arbitrasie. Net na half 10 is die partye hier, en ons kan begin. Soos dit mos maar altyd gaan, is dit 'n speletjie van 'kom ons kyk hoe ver kan ons dit vat....' Julle sal nie glo nie, maar ons gaan deur die hele arbitrasie, en net voordat die werkgewer sy 'closing arguments' moet lewer, besluit hulle om te skik!! 'n Volle 5 ure se intense konsentrasie, en hulle skik op die laaste. Mensig, julle sal nie glo hoe bly ek daaroor is nie, want eerder 'n skikking as dae se werk aan die arbitrasie bevel. Hierdie is goed en wel, maar as al jou werk op die rekenaar 'missing' is.... Moet op die einde 'n nuwe 'settlement' tik! So half 3 kry ek vir Christo, en ons gaan eet 'n toebie by 'aroma' in Killarney. Wanneer laas het ek 'n toasted cheese and tomato gehad....? En dis heerlik! Kuier en probeer net bietjie ontspan na die oggend se stress. Teen half 4 ry ons gou Amalgam toe, want ek moet by die sheriff 'n draai maak. Klaar daar, toe terug huistoe. Vanaand maak Christo vir ons heerlike hoender pasty. Net rustig voor die tv, en teen 10 uur is ek onder die appelboom... Dinsdag konsiliasies. Mensig, en die dag verloop mos nou nie te wel nie. Eers daag net die werkgewer op, toe net die applikant, en met die laaste vergadering daag niemand op nie! Vandag al gespook om my 'files' op die rekenaar te probeer kry, maar sonder enige geluk. En die ou wat ons instandhouding doen, is ook nie beskikbaar nie! Ek sien al hoe moet ek dit los vir Woensdag... Vanaand maak Christo vir ons heerlike spinasie lesagne met hoender. Dis absoluut wonderlik! Magies vol, ogies toe. Voor die tv gelê, en teen 11 uur in droomland... Woensdag eers 'n draai in die kantoor gemaak voordat ek uit is. Werk vandag nie net in die Roodepoort gebied nie, maar ook in Krugersdorp. Oppad word ek gestop by 'n pad-blokade. Ja ek weet, my liksens het verval, en ek was van plan om dit in die week te hernu. Wragties, die ou wil my 'n boete gee, en soos 'n goeie burger sê ek vir hom 'in die gees van Kersfees, laat my asb. gaan?' Weet julle wat is sy antwoord? 'Hy het 'n Kerspersent nodig....' Nee, ek het nie vir die ou geld aangebied nie, maar ek dink hy't gesien hierdie is 'n arm blanke.... toe laat hy my gaan!! Wel, nou's my eerse taak vir die dag om my lisensie te vervang. In minder as 15 minute is ek in en uit met my nuwe lisensie! Sommer vir my 2 nuwe nommerplate ook laat maak voordat ek uit ry Florida toe. Dis 'n lang en warm dag. Gaan maak ook 'n draai by die nuwe President Hyper. Wow, en is dit nie vir jou 'n groot winkel nie! Kry daar 'n Pachypodium van 15 cm. Mensig, vir hierdie prys kan ek dit nie laat verby gaan nie. 'n Volle R40!! Ons het Saterdag een by Keith Kursten gesien (oor 15 cm) vir R350! Kry vir Christo net voor 4 by Killarney, en toe's ons huistoe. Vanaand is dit mos 'carols by candlelight' by Zoo Lake, en ons gaan daantoe. Frans en Kobus kry ons hier by die huis, en ons ry sommer saam met hulle. 'n Heerlike plekkie gekry om te sit, en die piekniek-mandjie oop gemaak. Mensig, Christo het weer uitgehang met sy lekker broodjies, lewer pattè, kaas, you name it!! Steve en Niel het hulle ook later by ons aangesluit. Ag, die weer speel saam vanaand, en dis heerlik om te kuier, te sing, en na die musiek te luister. Daar's baie mense vanaand hier! Sou so graag van ons ander vriende ook hier wou gesien het, maar Philip, ons verstaan... Die aand het net te gou verby gegaan. Terug huistoe vir 'n koffietjie, wat tot half 12 aangehou het.... Skaars my kop op die kussing gesit, of ek's in droomland.... Donderdag weer uit op die pad. Vandag 'n klomp werkgewers wat gesien moet word. Dis mos maar elke dag dieselfde; net ander werkgewers! Vroeg-vroeg kry ek gou vir Christo by Mc Donald's in Mellvile vir 'n koffietjie. Lekker so vroeg in die oggend....! Toe's dit werk. By Brixton 'n pak biltong gekry, en by New Farmers 2 bottels wyn, mince en wors! Wow, dis baie welkom, want met die prys van vleis hou ons maar by hoender en vis. (nee, dit gaan nie so sleg met ons nie!!) Oppad terug gaan maak ek gou 'n draai by my liefste vriend Janneman. Ai, so lekker om hom te sien, en hy lyk so goed. Janneman, onthou ek is baie lief vir jou, en ek is altyd daar vir jou!! Skaars by die huis, of begin solank die binne-hof regkry vir vanaand. Sommer 'n paar vriende vir ete oorgenooi. Terwyl Christo die kos aan die gang kry, dek ek die tafel, sit die musiek en glase uit, en kyk ook tv. Net na 7 is Steve en Niel hier, toe Frikkels, Janneman en Koek's, en 'n paar minute later Egoli. Eers bietjie gekuier voordat die kospotte van Egipte uit gedra word. Mensig, vanaand is dit hoender-a-la-king met rys, soet pampoen, en 'n tuisgebakte brood! ....my sussie se resep!! (Lien, jou resep is die beste en wonderlikste ding wat Christo gekry het!!) En almal geniet dit baie. Skapie, baie dankie vir die heerlike kos, en al die moeite wat jy gedoen het met vanaand! Aan my vriende, baie dankie dat julle vanaand saam met ons gekuier het, en onthou julle is baie spesiaal in ons lewens. Wel, dis laat, en ek moet gaan. My wens vir die naweek:- Jesus is jou Sakdoek as jy huil! Hy is jou Hoekie as jy êrens wil skuil, jou Sambreel as hartseer oor jou reën! Hy is jou 911 as jy in Nood verkeer, maar meeste van als; Hy is die Anker op jou lewensboot - hou altyd daaraan vas! Geniet die naweek, en tot ons weer gesels; no worries mate, en take care. Coen xxxx

My Maandag Storie - 24 November 2008

Goeie dag uit 'n heerlike warm Johannesburg.

Mensig, ek hoop julle het ook 'n wonderlike naweek gehad, want glo my, myne was heerlik!! Wag, kry gou daai koffietjies, sit terug, dan vertel ek.... (Jammer Dominee Trevor dat jy vir 'n tweede keer moet kom regskuif om te lees.... gelukkig, hier is dit nou!)

Vrydag oggend is ek, Christo en Cornè na die begrafnis toe van Fred du Plessis. Hy was jare in die vleis-bedryf, en is Sondag nag skielik oorlede. 'n Groot begrafnis. Net by die kerk gewees, en toe terug kantoor toe. Vanmiddag admin gedoen, en net na half 5 by die huis. Vanmiddag weer bederf met 'n pragtige bos rooi, wit en geel rose! Mensig, dit lyk my Woolies blomme het hulle voordeel.... Baie dankie Skapie, dis pragtig! Vanaand gaan ons rustig by die huis wees. Christo maak sommer vir ons heerlike eishbine, bietjie soet pampoen en heerlike knoffel en pietersielie aartappels. Heerlik sê ek vir julle; heerlik!! Sommer vroeg voor die tv plat geval, en teen 11 uur onder die appelboom...

Saterdag vroeg op. Ivy is mos hier, so, ons gaan ontbyt eet! Die koerant saam gevat Nestcafè toe, en terwyl die oggend ontwaak, koerant gelees en rustig gekuier. Ons gewone kontinentale ontbyt met lekker koffie, en daarna 'n draai gaan maak by Keith Kursten se plant-plaas. Rond geloop, en elke plant bewonder. Mensig, en die mooiste rose gesien.... (wink wink, Moeder....) Kry sommer lus om tuin te maak met al hierdie pragtige blomme, bolle en rankers om my. Terug by die huis bietjie op die bed plat geval, want ek was gedaan. Word wakker net nadat Suid Afrika hulle eerste drie gedruk het. Dit klink asof Christo daar langs die veld is - so skree hy! En is ons nie trots op ons Bokke nie!! 42 - 6!! Arme Ingeland.... Vanaand het ons 'n ete by die kerk. Sit aan tafel van Willem en Chris. Raai wie is ook aan ons tafel...? Janneman en Frikkie!! So bly hulle kon dit gemaak het vanaand. Elke tafel is gedek volgens die gasheer se smaak.... en dis pragtig! Kristal, sy, silwer, porselein, en ook plastiese borde. Elk met hul eie betowering. Die voorgereg word deur elke tafel se gasheer voorsien, en ons het heerlike pannekoekies met vis in gehad, en 'n titselkie slaai vir garnering. mmmmm..... lekker! Eers die Koekie-cups gehad wat 'n show gegee het, en dit net so geniet. Mensig, ons het nogal genip - nie geweet of Dominee of Chris die 'vermaak' sou wees nie... Dan die hoofgereg was scotch fillet, hoender, groentes, aartappeltjies en rys. Gerhardt het al hierdie kosse voorberei, en dit was absoluut fantasties. Dominee Trevor, Gerhardt, en almal wat hierdie aand gereël het, baie dankie. Dit was een groot sukses! So lekker gekuier, lekker geeët, en teen 12 uur by die huis.

Sondag net laat geslaap. 10 uur ontwaak, en die dag stappie-vir-stappie hello gesê... Terwyl Christo die vuur aangesteek het, het ek myself bietjie skaflik gemaak. Later buite gesit om die koerant te lees, maar die sonnetjie het my so gebrand, dat ek terug in die huis is. Vanmiddag gebraaide hoender en groentes met kaas. Heerlik! Theuns is net voor 5 hier, want vanaand gaan ons Pretoria toe na die Reformerende Kerk Pretoria se Kerssangfees. Word gehou in die Stadsaal. So baie mense!! Janneman, Henco, Hennie, Brandon, Kobus, Christo, almal mense wat ek al jare ken, en vanaand hier sien. Die hele 'konsert' was goed, maar gans te lank. En die Vivace sanggroep moet maar eerder bly by gewone ouetehuis optredes... 'n paar goeie stemme wat in 'n groepie sing, met 'n laerskool sang-juffrou wat lyk of sy gaan opstyg soos sy probeer dirigeer... Jammer julle, nie eens tannie Evita se rooi skeppingtjie kon julle beter laat sing - of lyk - het nie... Maar dan was daar ook die Un.Ltd sanggroep, die Ref. Kerk sanggroep en die solis Tiro. Nie seker wat die solis se naam is wat deel is van Un.Ltd nie, maar boetie, jy mag maar! (die ou met die lang hare) Julle Stil, Stil, Stil was absoluut puik; dit het my 'stil' gelaat!! Ongelukkig het die hele Kers-gevoel verlore geraak in die stadsaal.... Dit was te veel van 'n konsert, te lank, en raak volgende jaar ontslae van ouetehuis sanggroepies. Hou eerder by dit wat ons eie is, want glo my, daar is baie talent!! Oppad huistoe by die One-stop vir ons elk 'n Steers burger met tjippies gekry. Vir Theuns gaan aflaai in Linden, en teen half 11 by die huis. Skaars my kop op die kussing gelê, toe's ek onder die appelboom...

My wens vir die week:-

As die nuwe oggend sy verskyning maak, het God klaar ons legkaart vir die week gebou. Geen blokkie sal uit sy plek skuif sonder Sy wete nie. Niks sal oor jou pad kom sonder Sy goedkeuring nie! Mag al jou blokkies hierdie week in plek wees met God se liefde en genade!!

Geniet die week, en tot ons weer gesels; no worries mate, en take care.

Coen xxx

Frikkie en Janneman.

Ons gasheer, Chris en Willem.

Coen en Christo.

Ek en my beste, beste vriend, Janneman.

Ek en Pierre. (Pierre ken ek vanaf 1989 - toe ons net in Jhb gekom het...)

'FAMOUS' PETER DEACON - The Weekly

Goeie middag almal. Jong, ek kan nie wag tot Maandag met hierdie nuus nie, want dis gans en al te belangrik om nie nou te vertel nie!! My klein-boet Peter se seun, Peter Peet Pieta Dicky Deacon het Woensdag aan die Premier Spelling Bee in Sydney deel geneem. Daar was 71 000 kinders wat begin het; toe 2 400 wat deurgegaan het na die streeks finaal toe. En toe was daar net 32 in die finaal! Kan julle glo, hy was een van hulle!!! Vir 'n boertjie van die Noordkaap om hier in die Ingelse Australië tot onder die laaste 15 te kom, is wonderlik! Ongelukkig het hy nie gewen nie, maar dit maak nie saak nie. Pieta, baie geluk, en jy sal nie glo en weet hoe trots ons almal hier in Suid Afrika op jou is nie! Ek kan al sien hoe trots jou pa en ma op jou is, en moenie vir Sussa vergeet nie! Nou is haar boetie 'famous'! Hy't 'n medalje gekry, 'n groot woordeboek, 'n sertifikaat, en 'n day pass na die Taronga of Dubbo dieretuin. Terug by die huis het die plaaslike koerant 'n storie en kiekie geplaas, en die verslaggewers staan glo tou om onderhoude te kry. Pa Peter en ma Riana, baie geluk met julle seun se prestasies! Hy is voorwaar 'n Uitblinker!! Ek sluit die storie in wat in die koerant verskyn het:- 'Kandos Public School student Peter Deacon will be battling it out against 32 other regional finalists at the ABC Centre in Sydney today for the title of state finalist winner in the Premier's Spelling Bee Final. Mr. Deacon was one of the four Kandos Public School students who attended the regional final in September before being selected to compete in the state championships. Principal of Kandos Public School, Dianne Moncrieff said 12-year-old Peter is a bright young boy who shows a great deal of potential. "This is the first time a student has made it to the state finals and we're delighted that he has made it this far. He's been studying for the competition and he's very prepared. I'm not really surprised that he got so far as we've always expected good things of him.... he's a very bright student," she said. Peter is a Year 6 student and school captain.' Meneer Deacon, nogmaals baie geluk!! The Weekly se berig. Pieta in Sydney by die Premier's Spelling Bee. Selfs buite by sy skool het hulle hom voorspoed toegewens!!

My Vrydag Storie - 21 November 2008

Goeie more, goeie more!

Ek hoop julle week was net so lekker, en vol verrassings soos myne! mmmmm..... wag, kry gou daai koffietjies, sit terug, dan vertel ek...

Maandag oggend eers gou 'n draai by die kantoor gemaak voordat ek uit is. Vandag is 'n lang, en warm dag. 'n Draai gaan maak in Sunninghill, toe Randburg toe, en toe terug kantoor toe. Cornè het my vroeg vanoggend gevra om as tolk op te tree vir 'n arbitrasie wat hy 1 uur het. Moet van ingels na afrikaans tolk.... (ken die omie wat dit versoek het - hy is net plynweg harde-gat, en kan engels praat en verstaan!!) Terwyl ek wag, doen ek admin. Die tyd kom en gaan, en niemand versoek my dienste as tolk nie. Wel, dit gee my die kans om al my admin op datum te kry. Teen die tyd wat ek my oë uitvee, is dit half 5. Kom by die huis, en daar wag 'n pragtige bos rose vir my op die tafel. En julle sal nie glo nie, op die bed is daar 'n klein bull hondjie met 'n persentjie om sy nek! Christo bederf my vreeslik vandag! Baie dankie, Skapie. Vanaand eet ons heerlike hoender dye met tjippies, en heerlike soet pampoen. Net rustig voor die tv, en teen 11 uur onder die appelboom...

Dinsdag weer uit. Eers gou 'n draai gemaak in Sandringham, en toe vir Christo by Nestcafè gekry vir 'n koffie. Heerlike railroad koffie!! 'n Vinnige een, en toe's ek verder. Moet Kya Sands toe, en ook Florida toe. Die dag vlieg net te gou. Dis warm, en bedompig buite. Net na 4 terug by die huis. Vanaand word ek bederf met heerlike hoender pasta! Mensig, dit bly maar lekker. Het gewik-en-weeg of ons nie moet gaan fliek nie, maar toe daarteen besluit. Rustig voor die tv, en soos klok-slag 11 uur in droomland.

Woensdag ry Christo weer saam. Florida, Roodepoort en ook 'n draai gaan maak by Westgate. Kry vir ons 'n Wacky Wednesday met tjippies, en sommer daar gesit en eet. Net lekker om weer 'back to normal' te wees vandag. Oppad terug 'n draai gemaak in Craighall, en toe huis toe. Vanaand is dit net lekker toebies, en alweer voor die tv. Ja, julle dink seker ek is 'n 'coutch patato'.... Gewone tyd in die kooi.

Donderdag is Christo weer saam. Vandag nie net Krugersdorp toe nie, maar ook Randfontein en Westonaria toe. In Krugersdorp by KFC vir ons elk 'n streetwise two gekry. Ai, dit bly maar lekker! Teen half 3 klaar in Westonaria, en oppad by Janneman gestop. Mensig, dit bly altyd lekker om my liefste vriend te sien. Vir hom 'n koelie gevat, en bietjie daar gekuier. Voordat ons huistoe is, eers gou by Killarney gestop. Vanaand eet ons hoender sosatie en knoffel-aartappel. Regtig lekker!

Wel, laat ek eers gaan. Die naweek is vol dinge.... 'n heerlike gemeente ete, en Sondag aand is dit Pretoria gemeente se Kerssang-diens. So, voordat ek te veel sê, hier is my wens vir die naweek:-

Hou 'n goeie maaitjie met albei hande vas, want 'n goeie maaitjie is iemand wat die lied in jou hart ken en dit sing as jy die woorde vergeet het.

Geniet die naweek, en tot ons weer gesels; no worries mate, en take care.

Coen xxx

Ruan

Met al die medaljes en sertifikate wat Ruan by die skool gekry het.

Nadia.

En hier is Nadia in haar eerste netbal-wedstryd.

Sussa en Boeta voor die konsert.

Nadia in haar skool-konsert as 'n see-perdjie.

Kyk hoe lyk Cyril nou!

Henry en Adelaide in Kanada. (my buurman van Northcliff...)

My Maandag Storie - 17 November 2008

Goeie more uit 'n heerlike warm Johannesburg.

Mensig, ek hoop julle het net so lekker naweek gehad soos myne! Sou net 'n rustige naweek by die huis gewees het... maar wag, voor ek te veel vertel; kry gou daai koffietjies, sit terug, dan vertel ek...

Saterdag vroeg op, want Ivy is hier. Christo het hulp nodig met sy Golf se deur-handvatsel, en ek help hom. Terwyl hy gou Rosebank toe is vir 'n vergadering, lees ek die koerant. Rustig buite in die koelte gesit. Net na 11 is Christo terug, en Ivy is ook klaar. Vanmiddag die dvd Sleeping Beauty gekyk. Niel bel om te hoor of ons nie wil oorkom vir 'n braai nie. Eers die rugby gekyk, en net na 6 is ons oppad. Goed om Niel en Steve te sien. Heerlike hoender gebraai, lekker slaai en heerlike groente. En ons kuier heerlik!! Later in die ja-kosie gesit, drankies gedrink, en gekuier! Mensig, teen die tyd wat ek uitgeklim het, het ek soos 'n verdroogde pruim gelyk! 'n Melktert en koffie vir poeding, terwyl Christo met Gabriella (Niel se Franse poedel) speel. Net na half 12 oppad huistoe. Niel, Steve, dankie vir 'n heerlike aand. Mensig, dis altyd lekker om saam met julle te kuier.

Sondag net laat geslaap. Teen die tyd wat ek ontwaak, het Christo al die koerante gekoop, en is die kos vir middag-ete amper klaar. Eers die koerante gelees voordat ek myself deur die stort gesleep het. Toe vir Marie gebel, want sy verjaar vandag. 60 jaar jonk vandag! Weet julle, sy't by my Moeder begin werk toe sy 17 was, en nou's sy 60. 'n Leeftyd! Ag shame, sy was so hartseer toe ek vir haar sing. Mara, baie geluk, en mag jy nog baie mooi en gesonde jare gespaar wees. Heerlike groente en vis pastei wat Christo gemaak het. Vanmiddag ons programme opgevang wat ons gedurende die week gemis het, en vanaand kerk toe. Ai, mos altyd goed om vir Janneman daar te sien! Dominee Trevor, dankie dat jy ons herinner om op te hou met kla, en meer die positiewe raak te sien.

Wel, Woensdag, die 19de, is dit die verjaarsdag van my klein-niggie Mari, en my kollega Craig. Julle twee, baie geluk, en mag die jaar vol geluk, vreugde, baie voorspoed en gesondheid wees.

My wens vir die week:-

May God bath you with mercy, towel you with love, cream you with honour, cloth you with grace, adore you with favour en perfume you with blessings.

Geniet die week, en tot ons weer gesels; no worries mate, en take care.

Coen xxx

Dylan en Logan (Oupa, kyk my horlosie!)

Logan slaap (lyk sy nie soos 'n poppie nie?)

Dylan (en skielik is ons skaam...)

Dylan met sy 'magic' hare.

Tatum wat lekker lag!

Tatum (Oupa, ek kan tog 'n tjomp eet met my groot mond!)

Verjaarsdag Wense vir my liefste Vriendin

Vandag wil ek 'n baie spesiale vriendin geluk wens met haar 60ste verjaarsdag. Marie werk vir my Moeder vandat sy 17 jaar oud was, en sy is nogsteeds daar. Sy het my groot gemaak, russies in my mond gesit as ek vloek, my gehelp om huiswerk te doen, my blydskap geken, en ook my hartseer... en sy kook soos die beste kok in die wereld! Mara, baie geluk met hierdie groot mylpaal in jou lewe, en mag jy nog lank vir jou familie, jou kinders en jou klein-kinders gespaar wees. Onthou altyd - ek is baie lief vir jou!

Liefste Marie,

op jou 60ste Verjaarsdag

16 November 2008

Once again I send my greetings

on this happy day.

Same old wish,

and same old words

- But what else can I say...?

Love's own language changes not,

and so I send to you

- the old and oft-repeated wish -

May all your dreams come true!

May you find a faith serene

- high courage - peace of mind.

May Time's finger touch you lightly,

and the years be kind...

May the bright Tomorrows

bring you health and happiness

- all the golden fruits of life -

Good fortune, and success.

God Bless, and take care.

Coen xxx

Marie.

Sy lyk mos nie 60 nie!!

My Vrydag Storie - 14 November 2008

Goeie dag uit 'n heerlike nat Johannesburg.

Ek hoop dit was net so 'n heerlike week vir julle soos wat dit vir my was? Lekker gereen, en ook besig by die werk gewees. Wag, kry gou daai koffietjies, sit terug, dan vertel ek...

Maandag eers 'n draai by die kantoor gemaak, en toe's ek uit. Christo ry weer vandag saam. Eers 'n draai gaan maak in Emmarentia, toe Sunninghill toe, en daar vandaan die Noorde gedoen. Wat 'n dag; nie net warm nie, maar ook 'n laaaaang dag! Eindig die dag in Florida, en net na 5 terug by die huis. Vanaand eet ons lekker skaap-boud op brood! Mensig, eet soos 'n koning vanaand!! Voor die tv gewees, en net na 11 onder die appelboom...

Dinsdag weer uit op die pad. 'n Klomp werkgewers wat gesien moet word. Roodepoort, Krugersdorp, Honeydew, en ook 'n draai by German Butchery gemaak. My vriend Niel gesien, en gou saam hom 'n koffietjie gedrink. Altyd lekker om hom so 'onbeplan' te sien. Gou-gou weer terug op die pad. Heerlike reen gekry terwyl ek gewerk het vandag, en teen half 5 terug by die huis. Christo maak vir ons heerlike spaghetti met hoender, van Sondag se boud, en 'n heerlike sous. Mensig, dis lekker! Julle dink seker my lewe is baie boring, maar ja, alweer voor die tv gewees.... En ja, alweer net na 11 in droomland...

Woensdag oggend 'n arbitrasie. Ai, en (gelukkig) daag net die werkgewer op. Vandag se arbitrasie word uitgestel tot 'n volgende datum. Skaars is die werkgewer weg, of die unie en die applikant daag op... Wel, soos ek gese het, die arbitrasie word uitgestel tot 'n volgende datum. Moet vleis gaan haal vir vanmiddag se vergadering by Rood Vleis in Florida, en oppad terug eers koffie gaan drink by my liefste vriend Janneman. So goed om hom te sien, en altyd lekker om saam met hom te kuier. Lekker koffie gedrink, en toe's ek gou Randburg toe om gas vir die gasbottel te kry. Net na 1 terug by die kantoor. Vanmiddag is dit die laaste raads-vergadering vir die jaar. Raai wie daag hier op....? Mamma Evilyn Selora! Ag shame, sy het oud geword, en hierdie sal sekerlik haar laaste vergadering wees... Toe die volgende vergadering. Ook die laaste MTAG vir die jaar, en na die tyd drinks, en prego steaks wat gebraai word. Ek, Craig en Mac is agter die kroeg, terwyl Corne, Jaco en Molefi met die werkgewers kuier. Later elk 'n heerlike prego rolletjie gehad, en ons kuier. Teen half 8 is almal omtrent weg; net ek, Craig en Mac wat nog kuier. (buiten vir die baas wat ook nog kuier) Ai, herleef weer saam met Craig die dae van LZ.... Lekker gelag, en nostalgies geword... 8 Uur is hulle ook weg. Vir Christo vroeer 2 prego rolletjies gevat, so, ons het klaar geeet. Skaars by die huis, of die hemel sak uit. Dis harde reen!! 'n Bietjie tv gekyk voordat ek in droomland is...

Donderdag weer op kantoor. Kan julle glo, ek het 3 konsuliasie vergaderings vandag, en niemand daag op nie! Dit beteken ek moet sertifikate uitreik vir onopgeloste sake.... Gelukkig gee dit my tyd om aan 'n bevinding te werk - wat al verlede maand moes uit gewees het...!! Vandag is daar nie tyd vir koerant lees nie; ek moet daai bevinding uit kry!! Gou gedurende lunch 'n lagie-slaai gemaak, want ons is vanaand genooi vir ete by Gaba en Derick. Die dag vlieg behoorlik, en teen half 5 is ek so-te-se op die hond se stert met my bevinding. Wel, vanaand gaan ons uit vir ete, en net na 6 ry ons. Eers by Janneman en Frikkels 'n draai gemaak, en toe agter hulle aan. Mensig, het Tania nie vir jou uitgehang nie! Heerlike vark fillette, pampoen, boontjies, aartappeltjies, blomkool met 'n kaas-sous, en heerlike tuis gebakte brood! O ja, amper vergeet ek, my slaai. Nie net is die kos lekker nie, maar ook die gasvryheid is wonderlik. Na die tyd speel ons eers 'n bietjie 'ten pin bowling' op die WII. Geniet dit, en lag lekker; mens sal sweer dis regtig! Janneman het die wonderlikste malva poeding gemaak, en ek eet twee borde! Ook 'n bietjie saam met Derick se ma gekuier... Dit was regtig 'n heerlike aand, en ons gaan sommer gou weer kuier. Toe ons ry, reen dit liggies. Vanaand is ek gedaan, en skaars by die huis, of ek's in droomland...

Vrydag eers aan my bevinding gewerk. Teen 10 uur is dit klaar, en gefaks vir die werkgewer en unie. Christo ry saam. Eers gou Hydepark toe, toe arbeids hof toe. Het 1 uur 'n dissiplinere verhoor by 'n werkgewer in Southdale. Was bietjie vroeg, en gaan loop rond by Southdale shopping centre. Wanneer laas het ek 'n cone gehad...? Vandag bederf ons onsself met 'n heerlike cone van die Wimpy. Ai, lekker!! 1 uur vir my afspraak, en terwyl ek besig is, sak daar 'n storm uit! Teen half 3 is ek klaar, en ons is oppad terug kantoor toe. Die kantoor sluit half 4, en gaan gou Killarney toe om 'n paar goedjies te kry. Vanaand maak Christo vir ons heerlike steak burgers. Mensig, Steers kan maar gaan slaap!!

Wel, ek moet seker klaar maak, want julle wonder seker hoekom die Storie nie vroeg Vrydag oggend uit was nie... My wens vir die naweek:-

Wat maak my swak? My vrese. Wat maak my heel? My God! Wat hou my staande? My geloof. Waaruit leer ek die beste lewenslesse? My foute. Wat maak my suksesvol? My moed om op te staan as ek val. Wat maak my gelukkig? Om te weet julle is my vriende!

Geniet die naweek, en tot ons weer gesels; no worries mate, en take care.

Coen xxx

Peter - heimwee....

Leanca, die scare-crow en Pieta.

Ruan met sy beker.

Ruan in sy SA sweetpak.

Kyk net hoe lekker dans Nadia!

My sussie! Is sy nie pragtig nie!!

Kyk hoe mooi is die hare!!

Lyk sy nie mooi in oranje nie?

Beautiful!!